المساعد الشخصي الرقمي

مشاهدة النسخة كاملة : قطوف


ياسر إبراهيم خليفه
03-01-2015, 05:06 PM
اسمع بعينك
وبص بودانك وشوف

مش هتفرق
ازاى هتسمع
ومش هتفرق
ازاى تشوف

المهم حس
ان فيك قلب دق
اوعى تقول
قلبك قلب خس
اوعى تقول للحب لأ
اوعى تشكى الظروف

سافر بعيد
بس خلي قلبك قريب
وسلم على الف ايد
ومتسلمش بقلبك
غير ع الحبيب
ولا قلبك شايل الوف

ازرع فى الحب شجره
واجنى من الثمار
وانزف م الدمع عبره
الحب دمع مليان وقار
الحب ثمره
ومحلى القطوف

ياسر إبراهيم خليفه
03-01-2015, 05:15 PM
وبعدين معاكى يامصر
ايه تانى هييجى جديد

لا هنبنى فيكى قصر
ولا شايفين فيكى عيد

كل يوم حاجه بتغلا
ورُخص الانسان يزيد

كل ثانيه يجيلك وليد
وقصاده رايح 100 شهيد


بلاش تفكر
بلاش تقرر
بلاش تحلم ببكره

اصل الشريف
مش لاقى الرغيف
والحرامي مليونير

هتقولي عادى
واقولك اكيد
بقينا فى وادى
والوادى بعيد

والصيف جاى تانى
وهناخد على عينا من تانى
ولا هيبقى ميه ولا هيبقى نور
وهيبقى فطارنا هوه السحور

قالوا يا منجي من المهالك
نجينا من الزمالك
ومين ينجي ولاد الزمالك
من رصاص فى القلب شابك

الكوره فن وتشجيع
بيموت عشانها الشجيع

بلاها كوره
نشرب سجاير
وياريتها شوره
تجيب البشاير

غلوا السجاير
طب نشرب حشيش
حتى الحشيش
اسف مفيش

ياسر إبراهيم خليفه
03-01-2015, 05:18 PM
انزل يادمع عيني
عشان اللي يستاهل
انزل وإملا ايديني
اللي راح مش ساهل

اللي راح مني الحنين
اللي راح مني السند
اب وام
دنيا ودين
اتنين اغلا من الولد

يا أمي وحشتيني
ووحشني ابويا وحماه
سنين منشفش دمع عيني
سنين وبصرخ آه يا حياه

يادنيا واخده
كل شيء غالي
امتي ازيح الهم من بالي

امتى افرح
وانسى جرح الفرقه تاني
وارجع لحضن امي
وانسى العذاب
امتى يسمح
التراب اخد مكاني
جنب ابويا تحت التراب

من تراب انا ابتديت
وللتراب انا فى النهايه
يارب عفوك يوم ما اشتكيت
وإجعل الجنه النهايه
مع ابويا وامي

ياسر إبراهيم خليفه
03-02-2015, 11:45 PM
أبكى والحزن مدينه
أبكي والدمعه سفينه
وسط بحر من الاحزان

أغرق فى بحر الهوى
والشوق مني ما ارتوى
ولا وصلت الى شطآن

يابحر الامواج الجارفه
اعاصيرك بالقتل عازفه
والقلب يشيع الجثمان

اما لنا فيك طوق للنجاه
اما لنا فيك امل فى الحياه
اطلق سراحنا ايها القرصان

تعبنا من سطر الاحساس
انفاسنا تعانى الاحتباس
افراحنا مغلفة بالاحزان

افراحنا تكبلها الدموع
احزاننا تبجلها الدموع
وشوق اللقا فيك حرمان

يا بحر السفر فيك غرق
والحبر منك دمع للورق
وقارئ الاحساس ظمآن

نتعطش فى الحياة للحياه
نتعطش فى السكوت بنطق آه
ويصرخ منا البوح كتمان

اهذى بالحروف لقارئيها
وحروفى للقراء تُبكيها
فعذرا يا مجموعة انسان

فأنا البكاء بلادموع
أنا قلم حبره موجوع
انا يقال لى إنسان

إنسان يبحر فى الاحزان
إنسان طليق مكبل اليدان
يسكن مدينة الآحزان

الصيـــ ( ضــــاري ) ــاد
03-03-2015, 01:20 AM
تذكرني بهشام الجخ
مبدع أنت ياياسر ....للشعر المصري طريقته الجذابه



واسمح لي بالمتابعه


خوذ وأستمتع .... هشام هذا مدرسة شعر وإلقاء وكل حاجه حلوه ...:qlbe3:




https://www.youtube.com/watch?v=UDoeMnzqEXc

ياسر إبراهيم خليفه
03-03-2015, 11:19 AM
أنتم اهل الإبداع يا صياد

من جزايلكم نستلهم روعة الحروف

وجودك دوما يثلج الصدر

ياسر إبراهيم خليفه
03-03-2015, 11:22 AM
ألم تشتاقِ مثلي
ألم تحنِ إلي وصلي

صوت الهمس يناديكي
لحن الشوق يغنيكي
احبك قبل القول بفعلي

السماء نجوم
وانتي فيها القمر
السماء غيوم
وانتي منها المطر
لظمأ القلب تسقي

امشي بوجهي مبتسما
والقلب بكاءه دامي
امشي بقوامي مرتسما
والقلب تمزقه ألامي
فمتى ياطبيبتي تأتي

انتظرتك اعوام واعوام
انتظرتك شمس
تمحو الظلام
وسأنتظر مهما كان
سأنتظر مهما طالت الأزمان
سأنتظر حتى يحين وقتي

لن أمل إنتظاري
وإن مل مني الإنتظار
لن أمل ان تتفتح أزهاري
مهما جفت الأمطار
لن أمل وإن مل أملي

ياسر إبراهيم خليفه
03-04-2015, 09:12 AM
لو مش عايز تسأل برحتك
انا قلبي دايماً يسأل عليك

ولو جارحنى انا سامحتك
اصل جرحك احلى مافيك

تجرح واحبك وأتمنى قربك
ماهو ياما قالوا الحب جرح

ومش بأيدي حبك ياسيدي
يخلينى أبكي فى عز فرح

طول غيابك وزود عذابي
ورد بابك قدام عتابي

ومهما تقسا ومهما تجرح
انا قلبي لسه فيك بيلمح

نسمة امل جايه تنادينى

ياسر إبراهيم خليفه
03-04-2015, 09:57 AM
ايه يعنى فقير
وفرشي حصير
منا قلبي اغنى من ملوك

ما ياما كتير
فيها المليونير
اشتروا فيك وباعوك

بكسب لقمتى بالعرق
ولا احب قاتل
ولا احب اللى سرق
وفى عز حزني وشي ضحوك


ياما ضيعنا وضعنا
ياما خسرنا وكسبنا
وياما دقت ع الراس طبول

اللى جاي بكره رايح
واللي ينصح عايز نصايح
والجنون ينطق بحكمه
احسن من حكمة عقول

عارف انك مش فاهمنى
ولا عارف ايه بيت القصيد
اصلا انا تهت مني
وعمال اعيد فى كلامي وازيد

خد كلامي مني حكمه
او انسى انك فى يوم قريته
ماهو صعب تبقى فى وسط ضلمه
وتقول دا نور وزاع صيته

الحكايه اكبر م الكلام
واكبر حتى م السكوت
عمالين نشد فى الحزام
وبقينا نصرخ ومافى صوت

يا دنيا فى ترابها الدهب
واللي من ترابها بقى الرخيص
الله يرحم اللي ذهب
ومعادش بكره فى الامل بصيص

ياسر إبراهيم خليفه
03-06-2015, 03:59 AM
عقلي فقد عقله
وظنوني زود جنوني
اللي قلبي اشتاق له
كان اول اللي باعوني

ليه يا حب قادر
تغدر فى عز الامان
وليه لسه بكابر
واقول لسه فى حنان

خلاااااااااااااااااااااااص
خلاص خلصت حكايه
حكاية حب بجنون

خلاااااااااااااااااااااااص
خلاص جات النهايه
ع القلب خلاص تهون

تهون عشرة حياه
يهون عشق فى صباه
وتهون دمعة عيوني

هكمل طريقي وامشي
وحدي فى عز الألم

واضحك للناس ب وشي
وقلبي يبكي بندم

ندم على عمر راح
اشتريت فيه فرحى بجراح
ندم وبقول سماح
واسامح اللي فاتوني

ياسر إبراهيم خليفه
03-07-2015, 04:31 AM
بانت الرؤيه
وهل هلال الرحيل
وعرفت انك مفارق سمايه

ياحب كان نسمه هاديه
داوت قلبي العليل
ورجعت فى شيبة قلبي صبايه

مبقاش خلاص فى امل
بقيت غريب
زى ما جيتها غريب
وهمشيها غريب للنهايه

ليه فتحتى جرح
ما صدقت انه اندمل
جرحي صعيب
ومفيش طبيب
يقدر يعرف دوايه

كل الناس عارفه الحكايه
حكايتى انا ويا الزمان
حكاية حب عاش فى سمايه
واسقيه بدمع الاحزان

عشان عارفين
ان احنا الاتنين
مفيش بينا لقا
فى دنيا كل اللى فيها فراق
دنيا شقى
وغرامها اكبر اشتياق

بس النهايه
معروفه واضحه
فى عز نومي ولما بصحى
بينى وبينك
حبنا ملوش نهايه

ياسر إبراهيم خليفه
03-08-2015, 10:53 PM
متعبتيش م الفراق
متعبتيش م البعاد

انا جوايا اشتياق
لابس لبس الحداد

لو على البعد قادره
انا مش قادر
وقلبي مجروح في بعادك

حياتنا العابها الشاطره
ميقعش فيها إلا الشاطر
وانا مش شاطر فى فراقك

قربي ليه بتبعدي
وجربي إحساس الحياه
انا حبى ليكى بيبتدي
والفراق قاتله فى صباه

انا احلامي سهله وبسيطه
بحلم يدوب افضل معاكى
بحلم اكون فى بحرك خريطه
توصلني شطي في هواكي

ياسر إبراهيم خليفه
03-09-2015, 09:50 PM
عارف بيقراني الورق
وبيكتبنى الدمع حبر

وعارف انى مخلوق اتخلق
من ميلاده رايح لقبر

يا دنيا فيها النور شرق
بعد عتمه ولت الدبر

يادنيا كدابك فيها صدق
وبقيتى مليانه عبر

فين نسيم وردك والعبق
فين احترام شيبة الكبر

هانت وبانت وسع الحدق
وبكره يقولونا فى خبر

ياسر إبراهيم خليفه
03-10-2015, 09:52 PM
الدنيا تلاهي
ومحدش فاضى
يحب حد

اللي فاكر
واللى ناسي وساهي
واللى قاضى
وهو اللى محكوم عليه بجد

اليوم يعدى كأنه ثانيه
ومحدش بقى للايام
يحسب ويعد

يادنيا عارفينك دنيا فانيه
ومن كتر ما عرفنا
كل اللى تاعبنا بُعد

بقينا نطوي المسافه فى خيالنا
بقينا نحلم اننا فى نفس المكان

والعمر طريق ماشيينوا سوا
ولا فارق معانا صيف وشتا
ولا فارق معانا حر وهوا

بقينا نصبر قلوبنا بكلامنا
ونسقى فرحنا بدمعة احزان

نتعب وآهتنا هيه الدوا
وجراحنا ضحكتنا ليها الغطا
يمكن فى يوم
يطيب لينا الهوى

دنيا تلاهي

ياسر إبراهيم خليفه
03-12-2015, 05:28 AM
مش عايز فيكي يا دنيا
غير قيراطين
قيراط حب وقيراط حظ
وبلاها قيراط الطين

قيراط ابنى لقلبي فيه عشه
الحب فيه بالهوى يتمشى
وانام صدري مرتاح
والدنيا تبقالى فرشه

وقيراط فيه من حظى اتعشى
مش عايز اكتر من قوت يومي
ولو قشه

ماهو ربنا وحده عالم الغيب
وعالم امتى الروح طالعه
ولافارقه نركب حمار او جيب
ولافارقه تقولوا فقير
او تقولوا واكلها والعه

قيراطين يادنيا
ولا كتير على الفقير
لو قيراط الحب
نجنى من ثماره بنت الامير

قيراطين يا دنيا
ولا كتير على الفقير
لو قيراط الحظ
يخلي الفقير مليونير

يازارعين الفدادين حنضل
بكره رايحين
وفايتين لنا الحنضل
من مركم واكلين
وشاربينو بزياده

ازرعوها خير
تطرح خير
وبزياده

ازرعوها خير
تطرح خير
وبزياده

ياسر إبراهيم خليفه
03-13-2015, 10:23 PM
سكران

وماشي فى ليل الشوارع اتطوح

سكران

والسكر مش شرب الخمره
دا الهم يسكر اللى نفسه يفرح

سكران والغم صاحب السهره
وياريته صاحب بيه افرح

يامغنىَّ

فين مواويل الحامولى
اللى بهمى
ارمي عليها حمولي

القلب صافى للناس
بس مين فى الناس صَفولي

الهم وقع كتافى من حمله
والزمن لو يوم صافى
باقى الشهر
قهر
مرسوم له

ومش عايزينى اكون سكران

رصوا الفلوس قدامي روزم
وهاتولي قصر فرعون
وخلوا الجواري يمين وشمال

لو على الفلوس
يامكتر الغنم
معاهم بدل الألف. مليون
وياريت حالهم عال العال

الفقير باصص لفلوس الغني
والغني باصص لصحة الفقير
والكل بيحسد الكل
وبين الكل قلبنا التعبان

ومش عايزينى اكون سكران

يا جيران يا صحبه
يا اهل وخلان
مين فى الخلق مش تعبان

ياعم محمود يا طه
الناس عايشه فى متاهه
وربك عالم الظواهر وخفاها
وكل البلد تقول
ولد ابراهيم سلطان

يابو عبدالله
والله الحال تعب والله
وفى عز ضحكتنا
الدموع هله
والحال من بعضوا واحنا جيران

ياعم حسام يا منير
يا اسطى وفى الصنعه خطير
لا عاد نافع فيها صغير ولا كبير
لا اشكيلك ولا تشكى لى
سيبها ع الرحمن

عارف هتقولوا
ياسر جاله جنان

ما كله ماشي بيكلم نفسه

ياناس

بالناس حواليكم حسوا
لا هتزودوا فى الدنيا
ولا فيها هتخسوا

كله مكتوب
من غير حرف زايد
او حرف نقصان

ياسر إبراهيم خليفه
03-16-2015, 11:27 PM
إستعنا ع الشقى بالله
ولينا مين غيره يعين

سامع دعانا وصرخة الآه
عالم خفانا م العناوين

قلوبنا زرع والدعوه مياه
بيها يطلع زرعنا من طين

والدنيا شجره طارحه حياه
والاخره ثمره للقاطفين

ازرعها للجنه من اول نواه
تقطفها ليك وللأخرين

لا تزرعها نار وغضبك لظاه
مش هتحرق غيرك أنين

ياعالم السر وما خفاه
لرضاك يا الله طامعين

ياهادى بهداك العصاه
إهدنا صراطك آمين آمين

ياسر إبراهيم خليفه
04-04-2015, 01:14 AM
عجبي عليك يا زمن
ركبتني العالى
من غير درجة سلم اطلعها

وخليت الهم راس مالى
وسقيتني الميه
من عيونى مدامعها

ولا عاد نافع
عمي ولا خالى
والرجال راحت
وكيف ارجعها

والكل مصاحب العالي
اللى معاه الفلوس يوزعها

وانا الفقير
مش عايز غير راحة بالي
وانسى الهموم ومواجعها

ياحمل زاد
ومن على الكتوف فاض
والدنيا زايده بلاويها

ولا عاد الزمن ينعاد
والكل على الشر ناويها

راح زمن شمشون والسندباد
وايوب بقى ذكرى
مع ان كل الناس بقت
فى زمانا بقت ايوب
والصبر زهق منا
وقال انا نفسي اتوب

كتر المواجع
خلت القلم يبكي
والكل شايف وسامع
وبالهم ما يشكي

خلص الكلام
وعلى الدنيا السلام
واللى شايل هم
ازاى ينام
مدام احلامه
صارت كلها غم

ياسر إبراهيم خليفه
04-05-2015, 02:16 AM
معروف انى بياع ثلج وصعيدي
ومعروف ان راس مالي كرامه

ولا عشان الجنيه اقولك ياسيدي
ابراهيم علمني الادب والشهامه

والواطي واطي لو كل من ايدي
والاصيل معروف للناس بإحترامه

اصلي معروف بقديمي وجديدي
من تراب وليه راجع بالسلامه

على الفقير يبكي الدم فى وريدي
ورمضان كريم للكريم من صيامه

ياجامع المال يا هارون الرشيدي
يفوز بالجنه صارف المال ع اليتامه

ياسر إبراهيم خليفه
04-10-2015, 05:53 AM
ملكيش حل يا دنيا
غير نعيشك زى ما انتى

نعيش بكيفك
وفى حر صيفك
من همومنا
اوجاع قلوبنا
امطار بتشتي

فى احزانك يا دنيا
قلوبنا اغنى
ودموعنا كنوز

وفى افراحك يا دنيا
بنشحت الضحكه
ولو جات معانا وضحكنا
بتبقى حظوظ

ملناش فى السياسه
وحروفنا مبتقولهاش الكتب

وكلامنا طالع من قلوبنا
ماهو شعر ولا خواطر
ولا مقاله ولا خطب

كاتبين احساسنا
الكلام طالع زى الرصاصه

ولا عارفين نعتب على حروفنا
ولا نعتب على قلوبنا
ولا نعتب على همومنا
ولا على مين العتب

ياسر إبراهيم خليفه
04-10-2015, 06:08 AM
جيت
وعليك بصيت
وما لقيتك

زعلت وبكيت
وياما قلت ليت
ليت الخطى
مرساها بيتك

وادينى ماشي تانى
ومعرفش امتى هرجع

ومعايا منك كل الاماني
ولنبض قلبك قلبي يسمع

مش مشكله بعد المسافه
ولا المشكله امتى اللقا

المشكله فى الحب اعترافه
وفراق قلوبنا كل الشقا

بس احبك وانت عارف
ومش محتاج احلف بحبك

دا على خدى بصمة شفايف
ونبض قلبي جوا قلبك

ياسر إبراهيم خليفه
04-14-2015, 09:12 PM
مستحيل اصدق
ان البعد فرق
مابينك وبيني

انا لما قلبي يعشق
فى بحر الحب يغرق
وانسي انينى

وبنسى معاك
كل اللى فات
حتى الذكريات
فى هم ليلى تغرق

الحب نور
من ضيه شمس الصبح بانت
والنجوم من بعد القمر
هامت وعانت

ياقمر نوره فى قلبي بدر التمام
كل ليله النبض يسرى
يوصلك منى السلام

ومش عشان خلص بينا الكلام
تفتكر حبى ليك ودع ومات
انا من سكوتى
صارخه منى كل الاهات
وفى بعادك جوا قلبى
نبض دمى
وكل همى
يحكى شوق
متخلصوش كتر الساعات

هتقول بحبك
دى كلمه متوصفش معانى حبى ليك
دى يدوب نقطه فى بحر كل امواجه تناديك

الحب صمت وسكوت
ونظره من عين باهتمام
نظره تلمح
صُبح صَبح
وليل بيجرى
وسط حلمه
قلب يفرح
لما يعرف
انك هواه
وقصة غرام

ياسر إبراهيم خليفه
04-25-2015, 05:26 AM
معادش باقي فى الدنيا ياسر
كل اللى باقى بكاء بلادموع

واللى شاري فى الدنيا خاسر
واللى رايح ماباينلوش رجوع

ياتبقى فيها وحش من كواسر
ياتبقى فيها من اهل الخضوع

اصل معروف قليل البخت عاسر
عمر عينه ما تشبعها الدموع

رغم هم القلب .. العشق آسر
والنبض شوق بلون ابيض ينوع

يا هم اعتى من جبال الدواسر
وياعشق كل ما اشبع فيك اجوع

الهوى شربة ظما من نهر حاسر
مده جذر . نبض ما يسقي زروع

ياسر إبراهيم خليفه
05-02-2015, 02:38 AM
بين اوجاعك واوجاعي
ياما كلام يقوله سكوت
وياما آهات بدون داعى
بتتدلع بعلو الصوت

من امبارح مات
في الامل بكره
والنهارده اهو فات
وبكره ماضي فى الذكرى

عايشين ايام بلا احلام
وماسكين اوهام
ونتمنى تكون واقع

ياما نفسي انام
وانسى انى هكون صاحي
ولا احلامى تحس بجراحي

لكن مكتوب
فى الهوى مانتوب
ودمع العين
من نبض القلب
نيلنا اكيد نابع

يانبع الدمع
امتى تجف امطارك
غلبني النظر والسمع
واعتذرت مني اعذارك

وصرخة آه جوا القلب
كاتمه ألم مكبوت

بين اوجاعك واوجاعي
ياما كلام يقوله سكوت
وياما آهات بدون داعى
بتتدلع بعلو الصوت

ياسر إبراهيم خليفه
05-04-2015, 03:57 AM
أنساها

الكل بيقولي إنساها
أنساها طب ازاي انساها
وانا كل نقطه فى دمي فاكراها
وكل نبضه فى قلبي نابضاها
وكل كلمة حب ناطقاها
ولما بصرخ م الألم
بتكون فى صرختى الآهه

أنساها

ازاى وانا كل حروفي كاتباها

ياناس الحب عمره ما كان ذكرى
دا هي الامل بكره
ومن عيني دمعه بتحير
فى هواها عمري ما اتغير
وان سكت يوم قلبي
عقلي عاشقها بالفكره
دا هي البسمه
لما سفينة همي
توصل شط مرساها

انساها

طب ازاى من غير هواها اعيش
دا هي قوت قلبي
وغيرها مليش
دانا لو صاحب كيف
هي لدماغي حشيش
ولو كيفي حلاوه
هتبقى سكره السنترافيش
ولو فى حبى انا بلطجي
هتبقى هي لسوابقى الفيش
اصل الكيف مهوش بالكيف
وانا مش بكيفى
ان كيفى فى هواها

أنساها

دا المجنون عمره ما نسي اسمه
والفنان عمره ما نسي رسمه
وانا اتولدت وعلى قلبي الهوى مكتوب
ومحسوم امرى فى الهوى
وياريت انا حاسمه

وإسألوا عنى مليون عاشق
إسألوا الهايم
وإسألوا اللى فى هواه غارق
هيقولوا فى بحر الهوى انا القبطان
عاشق قمر
عمر النجوم ما جمبه تبان

وازاي نور شمعه هتطفى نور الشمس

واقول لكم اكيد تحصل
لما تلاقونى فى الهوى ولهان
وبرسم على جدار السما بألوان
والاقى عقلى ودانى
اسكن جوا وجدانى
واقابل روحى بجروحى
ولما اجى اكلمها
الاقى كلامي غناها